السلطات في ولاد تايمة خلات مول الفوقية لي كفرني وهددني وتاهمني بالإلحاد وأنا شريف حفيذ الرسول وماشداتوش لحد الآن ومشاو عتاقلوا شباب فنان مبدع على ود طريفة ديال الحشيش المغرب هو أكبر منتج ديالها في العالم

أولا عيب وعار على البلاد والعباد الحكومة والشعب الدولة العميقة والضحلة أنه يتشد مواطن مغربي بطريفة ديال الحشيش في بلاد من أكبر المنتجين ديال الزطلة في العالم، راه بحال الى غادي يتشد مواطن سعودي بتهمة حيازة قرعة ديال النفط، تانيا الشاب الفنان المبدع لي تشد في أكادير على ود محتوى رقمني كتبان فيه الحشيش بحال الى جايبها من واكادوكو وهي منتوج مغربي خالص، والفيديو كان إبداعي زوين، هاداك راه عمل فني ماشي دعوة لتعاطي المخدرات، لي بغا يكمي الحشيش ماغاديش يتسنى حتى يشوف فيديو في تيك توك راه في كل دريبة بزناز، حشومة هاذ الإنتقائية والحكرة، كون كان هاد الشاب في كازا أو الرباط وباقي مدن المركز مكاينش لي يهدر معاه كولشي كيتصور بالزطلة وهانية، طوطو وحليوة وعرام ديال الفنانين كيتصورو مع الحشيش وهذا عمل عظيم ويحترم من طرفهم لأنه كيصالحو المغاربة مع منتوج وطني، مقنن إستهلاكه في العالم المتحضر وحنا لي كنتجوه باقي مجرم.

السلطات في ولاد تايمة خلات مول الفوقية لي كفرني وهددني وتاهمني بالإلحاد وأنا شريف حفيذ الرسول وماشداتوش لحد الآن ومشاو عتاقلوا شباب فنان مبدع على ود طريفة ديال الحشيش المغرب هو أكبر منتج ديالها في العالم هادشي هو لي كيخلي الشباب المغاربة يهاجرو ويطلبوا اللجوء برا بحال الى هاربين من أفغانستان هو هاد إزدواجية المعايير، وراه كيتقبل ليهم اللجوء حيت هادشي ماشي كذوب راه واقع كيتعاش وكيعيشوه الفنانة بحال هاد الشاب من ولاد تايمة، وللي للأسف لحد الآن ماخرج حتى شي فنان دافع على حقو في الإبداع، لأن بنفس التهمة باش تشد هاد الدري يقدر يتشد حتى طوطو وطه ايسو وحليوة والزعيم وبزاف خرين، الى تفتحات هاد الباب ديال الدعاوى لأي حاجة مكتعجبش الناس فراه القضية توصل حتى للدروس الحسنية، لأن تاحاجة ماعليها اجماع في المغرب من غير وجع التراب.

ف2003  كانو تشدو مجموعة من الشباب المبدع الفنان كيديرو الموسيقى ديال الروك بدعوى أنهم عبدة الشيطان، بنادم ماعبدجش حتى سيدي ربي بقا غير يعبد الشيطان، شدو شباب كيتصنت لموسيقى وعايش الهيت ديالها ظلما وعدوانا وسيفطوهم للحبس مع المجرمين والقتالة واللحايا، من وراها بشهرين وقفوا الأحداث الإرهابية ديال كازا، خلاو المتشددين حداهم كيوجدوا لحمام دم ماتوا فيه بزاف ذيال المغاربة ومشاو شدو شباب كيدير الموسيقى محب للحياة والنشاط شباب واعي ومثقف، وخلاو دعاة الموت والإرهاب خدامين على خاطرهم حتى تصدم المغرب بدوك الإنفجارات، حاليا كيبان بحال الى الدولة باغي تدير نفس الخطأ، مخلية المتشددين والظلاميين كيكفروا على خاطرهم بدون حسيب والا رقيب، وغادا كتعتاقل في الشباب الفنان المبدع لي بعيد على الفكر الظلامي قريب من الواي واي وتيك توك والمريولات والمريولين حماة أبناء الطبقات الشعبية من التشدد.

Taroudant 24 - جريدة تارودانت 24 الإخبارية