"كاپو" الجيش يطلق "صرخة مظلوم" من داخل السجن بعد شهر من "شغب" مولاي عبد الله

نشر سفيان بلمقدم الملقب بـ"طيرو"، قائد مدرج "الكورفاتشي" المساند للجيش الملكي، تدوينة على حسابه في "فايسبوك"، بعنوان "صرخة مظلوم"، من داخل أسوار السجن، بعد ما تم اعتقاله على خلفية أحداث الشغب التي عرفها ملعب مولاي عبد الله بالرباط، بعد نهاية مباراة "العساكر" والمغرب الفاسي، الشهر الماضي، عن منافسات كاس العرش.

وكتب "طيرو": "اليوم قريبة لشهر وأنا بعيد على الأم والزوجة ديالي، على خدمتي وحياتي، لي عمر كان فيها المشاكل ولا الحبس ولا شي حاجة خارج إطار القانون، حتى كنلقى راسي كنتحاسب بتهم لي ربي وحدو لي عارف أنني بعيد عليها، والأغرب أن من بين التهم من غير التحريض، الاتجار فالمخدرات، تكوين عصابة إجرامية وعدم تبليغ عن جريمة..".

وتابع سفيان بلمقدم: "سفيان كيعرفو كل واحد فيكم، هادي سنوات وهو كيعطي من وقتو ومن جهدو باش يساهم بداكشي لي قدر عليه ككابو ديال الجمهور، وما عجبنيش شنو وقع فمقابلة المغرب الفاسي، وعمري غنكون معاه، ولا مع أي حدث فيه العنف، لأنه الاعتداء على الأمن ما كيشرفش الجمهور، وتخريب الممتلكات ما كيشرفش حتى حد، ولكن اليوم كنلقى راسي كنتحاسب على هادشي، بحالا أنا لي درتو !!".

وأضاف قائد جمهور الجيش الملكي: "مع العلم أن الملعب فيه كاميرات فيه وسائل مراقبة، وأنا غادرت الملعب قبل الصداع بالأدلة والفيديوات والشهود، إذا علاش أنا هنا ؟ شنو التهمة ديالي الفعلية، وشناهي المساهمة ديالي فهادشي من غير الكلمة الفضفاضة ديال التحريض؟".

واردف "عمر التومي لي حتى هو معايا فنفس المشكل بلا ما نحتاج نقوليكم عليه أنه إنسان مسالم وولد عائلة وكيبغيه الصغير قبل الكبير، وعمرو كان فشي حاجة عندها علاقة بالشغب، اليوم كيلقى راسو كيتحاسب على شي حاجة ما دايرهاش حيت كيطلع كابو، وخاصكم تعرفو أن ولدو غيتزاد وهو هنا، حيت الزوجة ديالو على مشارف الولادة.".

وختم "كاپو" جمهور الجيش "الحرية لينا، ماشي شعار، الحرية لينا حيت نستاهلوها، ومظلومين ماشي شعار، مظلومين حيث عيب دراري فمغرب 2022 مشدودين لمجرد أنهم كابوات، كون كنا دايرين ولا مشاركين نستاهلو والقانون فوق الجميع، ولكن النهار كيدوز علينا هنا بحال عام، حيت ما دايرينش وحيت أبرياء، وحيت خلينا عائلات، وخلينا خدامينا مورانا.. ربي كبير وغادي يفرجها بإذن الله، والإيمان ديالنا بالله والبراءة ديالنا ما غيوقفها حتى واحد".

Taroudantpress تارودانت بريس - Taroudant 24