الجيران تشكاو من صداع التوريست.. الپانو ديال هوليوود يقدر مايبقاش بلاصتو

قال جورنال “ذا تايمز” البريطاني أن سكان منطقة هوليوود كيتشكاو من كثرة الزوار اللي كيجيو باش يتصورو مع الپانو الكبير (Hollywood Sign) اللي فيها سمية أشهر منطقة سينمائية فالعالم.

الپانو اللي الطول ديالو 106.7 مترو كان فالأصل إعلان مؤقت ديال مشروع تطوير عقاري فالمنطقة قبل ما يولي مع مرور الوقت من أشهر رموز هاد المنطقة فلوس أنجلوس (ولاية كاليفورنيا)، واللي كيزورها حوالي 10 مليون شخص كل عام، واللي كيخليو الأثر ديالهم وكيتسببو فصداع الراس لسكان أقرب حي للبلاصة اللي مفيكسي فيها الپانو المذكور فوق الكدية.

الدرب اللي ساكنين فيه أغلبية نجوم هوليود كيتبرزط بالحضور المتواصل للزوار والتوريست، وقالو بعض السكان تما بللي هاد موجات التوريست ولاو خطر على المنطقة، والبينتات ديال الكَارو والحشيش اللي كيلوحو كتسبب بزاف ديال المرات فشعيل العافية تما حيت البلاصة غابوية بدرجة أولى.