فضيحة بطلها الوزير البامي السكوري. مشى للحج فالوفد الرسمي وكان لاصق مع ماماه. ايلى بغيتي الرضى ديها قبل ما توصل للوزارة وما تستغلش الامتيازات ديالك كعضو فالحكومة
البارح لاربعا 13 يوليوز 2022 رجع الوفد الرسمي من الحج. الوفد كان رأسو وزير العدل الامين العام لحزب الاصالة والمعاصرة عبد اللطيف وهبي. كان فهاد الوفد يونس السكوري وزير الإدماج الاقتصادي والمقاولة الصغرى والتشغيل والكفاءات. لوزير ما عندو كفاءة. جاتو لوجيبة طار عليها ومشى للحج باش يكون فالوفد الرسمي ومفطح ويدوز حج “ڤي اي بي”.
كلشي هنا نقدرو نقبلوه. الغريب هو ان هاد السيد بغى يبان مرضي الوالدين. كانت امو فالحج وديما شاد فيديها. اييه باغي الرضى على حساب الدولة وامتيازاتها.
هي مشات بوحدها. خلص عليها ولدها يالله. ولكن باش تكون معاه راها مع وزير عضو فالوفد الرسمي. يعني كيكون عندها حج فظروف واعرة.
هادي فضيحة وكون دارها شي وزير من البي جي دي ايام حكومة العثماني كون كلشي هاجمهم وتيرا فيهم.
راه استغلال لمنصب هادا. هاد وزير الكفاءات والادماج الاقتصادي قدر يدمج امو فامتيازات الوفد الرسمي وصافي وبحضور الشاف ديالو فالحزب.
على هاد القبال اللي عندو شي واحد من العائلة من اعضاء الوفد الرسمي يدبر بسهولة على ڤيزا للحج ويخلص عليه وباش يوصل تماك يبقى معاه. التخربيق وصافي
