ماشي بعيد يكونو منهم مغاربة. لقاو حراگة عريانين فالحدود التركية اليونانية

لقات وكالة اللاجئين التابعة للأمم المتحدة شي 100 حراگ عريانين فالحدود اليونانية والتركية. وقالت الوكالة الاممية باللي هاد الشي برزطها بزاف.

طبعا تبادلات الدولتين اللي نايضة بيناتهم اصلا٬ التهم. شي لصقها فشي. اثينا اتهمات انقرة وقالت باللي هادا سلوك ما فيهش ريحة الحضارة وانقرة ردات “هادشي غير كذوب.

وطالبت المنظمة الاممية باش يدار تحقيق على هاد الحادث. واكدات اليونان باللي هاد التحقيق دارتو منظمات وشاركو فيه مسؤولين من فرونتكس =وكالة الحدود الاوربية=

وقالت اليونان باللي هادو جاو من تركيا وعبرو نهر ايفروس ووصلو بلا حوايج وشي وحدين مضروبين وان غالبيتهم من افغانستان وسوريا. طبعا كاينة جنسيات اخرى.

لمغاربة كيحرگو لاوربا من هاد المنطقة ومن مناطق اخرى. هاد الشي علاش من المتوقع يكونو شي مغاربة مع هاد الافغان والسوريين.

اليونان كبرات القضية واتهمات الجيش التركي مباشرة بنقلهم حتى هاد الواد وطالبت الحكومة التركية بتفسير يقبلو لعقل فرد عليه فخر الدين ألتون كبير المساعدين الصحفيين للرئيس رجب طيب أردوغان على موقع التواصل الاجتماعي “عادت الآلة اليونانية للأخبار الكاذبة إلى العمل”.

ووصف المزاعم بأنها “لا طائل منها ومثيرة للسخرية”، متهما اليونان بعدم احترام اللاجئين بنشر صورهم.